பண்புடன் ஆண்டு விழா - வார நட்சத்திரம் - மிதிலா - 4

பிம்பங்கள் புழங்கும் அரங்கம்
- மிதிலா

செங்குத்தான கோணத்தில்
அவரவர்க்கான கண்ணாடியில் முகம்பார்த்தபடி நாம்
அலங்காரம் திருத்தம் மேற்பூச்சு மெருகூட்டல் என
தயாராயிற்று ஊரார்முன் காட்ட
அவரவர் பிம்பம்

இதழில் வழியும் பூரித்த குறுநகையுடன்
ஒன்றாய் அழகுபார்க்கிறோம் இப்பொழுது
உனது பிம்பத்தை நானும் எனது பிம்பத்தை நீயும்
எனது பிம்பத்தை நீயும் உனது பிம்பத்தை நானும்
விருப்பப்படி கட்டமைக்க முயலுகையில்

நொறுங்கிச் சிதறும் நிலைக்கண்ணாடி
ஒவ்வொரு சில்லிலும் பிம்பத்தைக் காட்டியபடி
பிம்பச்சிறையின் சாவி தொலைத்து
உண்மையைத் தேடுகையில்
கூர்த்த முனைகள் கீறி வழியும் குருதி
சிவப்பாக்கும் மனங்கள் புழங்கும் அறையை.