பண்புடன் ஆண்டு விழா - வார நட்சத்திரம் - மிதிலா - 5

கனவுகள் நெரியும் சாலை
- மிதிலா

சொட்டுச் சொட்டாய் உள்ளூர ஊறி
உப்பிப் பெருகும் புழுக்கங்கள்
இயல்பைப் போலிசெய்யும் அரிதாரம் உதிர்ந்து
பேச்சும் இசையும் தீர்ந்த வேளை
ஏக்கம் கசியச்செய்யும் நினைவுகளும்
இயந்திரமாய் இயங்கும் புலன்களும்
அதீத அறிவு கூர்தீட்டிய சிந்தனைகளோடு
கைநழுவிய கணங்களும் நீந்தும் தனிமையில்
சுவர்கள் பூதாகாரமாய் வளர்ந்து மேல்கவிய
ஆற்றாமை கிளப்பிய பேரோலமாய்
உயிரின் ஆழத்திலிருந்து வெடித்துக் கசியும்
கண்ணீராயும் கவிதைகளாயும்.